Թեմ
Հրապարակված է: 02/20/2020
Փետրուարի 20-ին Հայաստանեայց Առաքելական Ս. Եկեղեցին նշեց Ս. Վարդանանց տօնը: Այս առիթով, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն պատրիարք եւ Ամենայն Հայոց Կաթողիկոսի, Մայր Աթոռի միաբանութիւնը Ս. Գայիանէ վանքում մասնակցեց Պատարագի սրբազան արարողութեանը:
Պատարագիչն էր Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանը:
Ս. Պատարագին ներկայ էին թեմակալ առաջնորդներ, Գեւորգեան հոգեւոր ճեմարանի սաներ եւ բազմաթիւ ուխտաւոր հայորդիներ:
Ս. Պատարագի ընթացքում Նաթան Սրբազանը, խօսելով Ս. Վարդանանց տօնի ու խորհրդի մասին, մասնաւորաբար նշեց․«Այսօր՝ Ս. Վարդանանց տօնին, մենք յիշում ենք քաջ Վարդանին եւ նրա 1036 զօրակիցներին, որ կեանքի ու մահու կռւում նահատակութեան լուսապսակն առան իրենց վրայ՝ ապահովելու համար մեր յաւիտենութիւնն ու փրկութիւնը: Այս կռւում, թէեւ աւելի զոհեր տուեցինք, բայց հայի հոգին ու հաւատքը յաղթանակեց ու մնաց կայուն: Եւ սրանից յետոյ էր, որ պարսիկները դադարեցին ստիպել հայերին հաւատափոխ լինել: Այս է մեզ համար ամենակարեւոր դասը տրուած մեր սրբերի զոհողութեամբ: Սակայն, ցաւօք, այժմ մեր կեանքում շարունակւում է Աւարայրը, շարունակւում է մեր հաւատքի, մեր ճշմարտութեան եւ ազատութեան համար պայքարը: Բոլոր ժամանակներում, երբ հետեւում ենք պատմութեան ընթացքին, տեսում ենք, որ մենք միշտ մղել ենք այն պատերազմը, որ սուրբ Վարդանանք կոչել են վասն հաւատի եւ վասն հայրենեաց: Եւ այսօր էլ այդ պատերազմը շարունակւում է․ շարունակւում է ճշմարտութեան ու կեղծիքի, հաւատքի ու անհաւատութեան, արդարութեան եւ անարդարութեան, մեր հոգու ու մարմնի ազատութեան պայքարը»:
Սրբազան Հայրն ընգծեց նաեւ, որ այսօր Աւարայրը ոչ միայն հայ ժողովրդինն է, այլեւ ողջ քրիստոնէութեանը, քանի որ քրիստոնէութեան դէմ յարձակումներն աշխարհում աւելի ու աւելի մեծ թափ են ստանում եւ աշխարհականացուած հասարակութիւնների մէջ տեսանելի է, որ Քրիստոսի նկատմամբ առկայ է խորը վստահութեան ու հաւատքի լուրջ պակաս:
«Մենք այսօր մտահոգութիւններ ու մտածումներ ունենք նաեւ մեր երկրի, մեր ժողովրդի եւ մեր երիտասարդութեան ապագայի համար: Յիշելով Ս. Վարդանանց հերոսներին՝ հարց է առաջանում, թէ այսօր մեր ապագայ սերնդի, մեր այսօրուայ երիտասարդի հերոսը ո՞վ է, ու՞մ նմանուելու կամքը եւ ձգտումը կայ: Այսօր մեր առջեւ ծառացած է այն հարցը, թէ ո՞րն է հայ քրիստոնեայի պատգամը աշխարհին, ի՞նչ ուղերձ ենք մենք տալու համայն մարդկութեանը մեր կեանքով եւ հաւատքով:
Սիրելիներս, Ս․ Վարդանանց յիշատակը եւ նրանց գործը մեզ նոր մղումների, նոր խիզախումների ճանապարհ է տալիս՝ ոգեւորելով ու ապացուցելով, որ միայն հաւատքն առ Քրիստոս եւ աստուածատուր սէրն է, որ կարող է փրկել մարդկութիւնն ու աշխարհը: Միայն Յիսուսի հաւատքն է, որ կարող է մեզ տալ իրական ազատութիւն, այն ազատութիւնը, որի ժամանակ մարդ վախ չի ունենում զոհելու նոյնսիկ իր անձը»,- ասաց Նաթան արքեպիսկոպոսը՝ յաւելելով, որ Վարդանանց տօնին յիշատակւում են բոլոր զոհուած հայ հերոսներն ու զինուորները, ինչպէս նաեւ Հայ Եկեղեցին իր օրհնութիւնն ու շնորհաւորանքն է բերում բոլոր նրանց, ովքեր կրում են այդ հերոսների անունները:
Սրբազանը միաբանութեան եւ ներկայ հաւատացեալ ողջ ժողովրդի անունից, շնորհաւորեց նաեւ Հայոց Հայրապետին անուանակոչութեան օրուայ կապակցութեամբ՝ մաղթելով, որ Տէրը Նորին Սրբութեանը պարգեւի ուժ ու կարողութիւն շարունակելու եւ յաղթանակի տանելու մերօրեայ Աւարայրի ճակատամարտը, առաջնորդելու հայ ժողովրդին հաւատքի յաղթական ճանապարհով, Հայրենիքը՝ խաղաղ ու բարօր կեանքին:
Սրբազան արարողութեան աւարտին, նախագահութեամբ Մայր Աթոռի Եկեղեցական հայեցակարգային հարցերի գրասենեակի տնօրէն Գերաշնորհ Տ. Վազգէն եպիսկոպոս Միրզախանեանի, կատարուեց Հայրապետական մաղթանք:
Եկեղեցականաց դասն ու ժողովուրդը միասնական աղօթք բարձրացրեցին առ Աստուած Ամենայն Հայոց Կաթողիկոսութեան անսասանութեան, շէնացման ու պայծառացման եւ Ամենայն Հայոց Կաթողիկոսի կենաց արեւշատութեան ու արդիւնաւոր հովուապետութեան համար:
