Սուրբ Խաչի Չորրորդ Կիրակի

«Եղբայրներ, ողջ եղեք, հաստատուն մնացեք, մխիթարվեցեք, միաբան եղեք,

խաղաղություն արեք, և խաղաղության ու սիրո Աստվածը թող լինի ձեզ հետ»։

Բ Կորնթացիներ 13։11

Կյանքի փոթորիկների և անընդհատ փոփոխվող աշխարհի մեջ մենք հաճախ մոռանում ենք խաղաղության և սիրո արժեքը։ Օգտագործելով ժամանակակից տեխնոլոգիաներն ու սոցիալական ցանցերը, մենք կարող ենք միաժամանակ մոտեցնել միմյանց և հեռացնել՝ դարձնելով աշխարհը փոքր, բայց սրտերը հաճախ տարանջատված։ Այս պայմաններում կարևոր է հիշել միաբանության և հոգևոր ուղեցույցի ուժը՝ այն ճանապարհը, որն առաջնորդում է դեպի խաղաղություն և հավատ։

Այսօր մենք ապրում ենք աշխարհում, որտեղ օրեցօր ավելանում են անհանգստության պատճառները։ Պատերազմները, քաղաքական հակասությունները, հասարակական պառակտումներն ու հոգեբանական ճնշումները խաթարում են մարդկանց ներքին խաղաղությունը։ Տնտեսական դժվարություններն ու մշտական լարվածությունները շատերի սրտերում վախ ու անորոշություն են առաջացնում, իսկ վստահության կորուստը խորացնում է բաժանումները։

Այնուամենայնիվ, հենց այսպիսի ժամանակներում ենք առավել շատ կարիք զգում միաբանության։ Միասնականությունն այն ուժն է, որը կարող է հաղթահարել ամեն մի փորձություն։ Երբ կանգնած ենք կողք-կողքի ոչ թե բաժանումներով, այլ սիրով ու համերաշխությամբ, իսկական խաղաղությունը սկսում է ծաղկել մեր ընտանիքներում, համայնքներում և ժողովուրդների միջև։ Մխիթարությունը գալիս է, երբ մարդը հասկանում է, որ միայնակ չէ․ Աստված մեզ հետ է մեր ցավերի ու պայքարների ընթացքում, Աստված մեզ հետ է միշտ։

Միաբանությունն այսօր դարձել է ամենամեծ պակասը։ Տեխնոլոգիաները, սոցիալական ցանցերը և գաղափարական բաժանումները հաճախ մարդկանց դարձնում են ավելի օտար միմյանցից։ Բայց առանց միասնության խաղաղությունը դառնում է անիրագործելի երազ։ Աստված ուզում է, որ մենք լինենք ոչ թե մեկուսացած անհատներ, այլ սիրո և համերաշխության մեջ միավորված մեծ ընտանիք։ Միայն այդպես կարող ենք հաղթահարել մեր առջև կանգնած դժվարությունները։ Միշտ հիշենք, որ սիրո ճանապարհը միակ ուղին է դեպի Աստված և հավիտենական խաղաղություն՝ «Եթե դուք սիրեք միմյանց, դրանով բոլորը պիտի իմանան, որ դուք իմ աշակերտներն եք» (Հովհ. 13։35): Եկեք հաստատուն մնանք մեր հավատքի մեջ, մխիթարվենք Աստծո խոսքով և ձգտենք եղբայրական միաբանության՝ մեր գործերով ու խոսքերով սերմանելով խաղաղություն։

Եկեք հաստատուն մնանք մեր հավատքի մեջ, մխիթարվենք Աստծո խոսքով և ձգտենք եղբայրական միաբանության և մեր գործերով ու խոսքերով միշտ սերմանենք խաղաղություն։ Թող այս պատգամը մեզ հիշեցնի, որ աշխարհն իր փոթորիկներով երբևէ չի կարող խլել մեր վստահությունը․ մենք կոչված ենք միմյանց սիրելու, սատարելու, մխիթարելու և միասին ապրելու։ Եվ հիշենք՝ միայն սիրով ու միաբանությամբ է, որ կկարողանանք հաղթահարել այս աշխարհի բոլոր փոթորիկները։ Մխիթարվենք, եղբայրաբար միաբանվենք և խաղաղության ու սիրո Աստվածը մշտապես ուղեկից կլինի մեզ մեր ամբողջ կյանքի ընթացքում ըստ Իր հայրական խոստման․ «Եվ ահա ես ձեզ հետ եմ բոլոր օրերում՝ մինչև աշխարհի վախճանը» (Մատթ․ 28։20):

ՄԻՔԱՅԵԼ սարկավագ ՄԱՐԳԱՐՅԱՆ