Թեմ
Հրապարակված է: 04/28/2017
Գոհունակութեամբ կը հաղորդենք Թեմիս հաւատացեալներուն, թէ Թեմակալ Առաջնորդ՝ Գերշ. Տ. Յովնան Արքեպիսկոպոս Տէրտէրեանի հովանաւորութեամբ եւ կազմակերպութեամբ Գալիֆորնիայի Հայ Գրողներու Միութեան եւ մասնակցութեամբ «Սիփան» Երգչախումբի, Կիրակի, Ապրիլ 23-ի երեկոյեան Առաջնորդանիստ Սրբոց Ղեւոնդեանց Մայր Տաճարին մէջ տեղի ունեցաւ Մեծ Եղեռնի Զոհերու Յիշատակին Նուիրուած Գրական-Երաժշտական Հանդիսութիւն, որուն Առաջնորդ Սրբազան Հայրը ներկայացուց Հալիվուտի Սուրբ Յովհաննու Կարապետ Հայց. Եկեղեցւոյ Հոգեւոր Հովիւ եւ Հարաւային Գալիֆորնիայի Առաջնորդական Փոխանորդ՝ Արժ. Տ. Մանուկ Աւագ Քհնյ. Մարգարեան։ Ներկայ էր նաեւ Առաջնորդանիստ Սրբոց Ղեւոնդեանց Մայր Տաճարի Հոգեւոր Հովիւ՝ Արժ. Տ. Խաժակ Քհնյ. Շահպազեան։
Ուրախ ենք հաղորդելու, որ գրական-երաժշտական հանդիսութեան գեղարուեստական ղեկավարը եւ «Սիփան» Երգչախումբի հիմնադիրն է Տիար Հենրիկ Անասեան։ «Սիփան» Երգչախումբի խմբավարն էր Սամուէլ Վարոսեան, իսկ դաշնակահարն էր Փրոֆ. Լեւոն Աբրահամեան։
Գործադրուեցաւ սքանչելի յայտագիր մը։ Բարձր գնահատանքով կը ներկայացնենք Գալիֆորնիայի Հայ Գրողներու Միութեան մասնակցող անդամներուն անունները ըստ յայտագրի հերթականութեան.-
Նազիկ Ղազարեան, Սիդա Պօղոսեան, Յակոբ Մկրտչեան, Գրիշ Դաւթեան, Սամուէլ Շահբազեան, Կիմա Կիրակոսեան, Գարուշ Հարենց եւ Յովսէփ Նալպանտեան։ Փակման խօսքը կատարեց Արժ. Տ. Խաժակ Քհնյ. Շահպազեան։
Հանդիսականները հոգեկան ցնծութեամբ եւ ազգային հպարտութեամբ բաժնուեցան Մայր Տաճարէն:
