Թեմ
Հրապարակված է: 06/19/2017
Յունիսի 19-ին, Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսի նախագահութեամբ, տեղի ունեցաւ Հառիճի վանքում գործող Թրբանճեան ընծայարանի հիմնանորոգուած մասնաշէնքի բացման արարողութիւնը: Ընծայարանը վերանորոգուել եւ գործում է տէր եւ տիկին Ջերալդ եւ Փատրիսիայ Թրբանճեանների (Լոս Անջելես, ԱՄՆ) ազնիւ բարերարութեամբ:
Արարողութեանը ներկայ էին Շիրակի թեմի առաջնորդ Գերաշնորհ Տ. Միքայէլ եպիսկոպոս Աջապահեանը եւ Մայր Աթոռում պաշտօնավարող եպիսկոպոսներ, Արթիկի թեմի առաջնորդական տեղապահ Հոգեշնորհ Տ. Նարեկ վարդապետ Աւագեանը, Մայր Աթոռի միաբաններ, Շիրակի մարզպետ Արթուր Խաչատրեանը, Արթիկի քաղաքապետ Մխիթար Վարագեանը, մարզային իշխանութիւնների ներկայացուցիչներ, ինչպէս նաեւ այս առիթով Հայաստան ժամանած բարերարների զաւակներ Լորի Մնչերեանը, Փոլ ու Հարրի Թրբանճեանները եւ Թրբանճեան ընտանիքի այլ անդամներ:
Այցը Հառիճի ընծայարան սկսուեց յուշատախտակի բացմամբ, որից յետոյ պատմական վանքի Սուրբ Աստուածածին եկեղեցում Վեհափառ Հայրապետի գլխաւորութեամբ մատուցուեց գոհաբանական աղօթք: Տաճարում ներկաներին ողջունեց Արթիկի թեմի առաջնորդական տեղապահը` ուրախութիւնն արտայայտելով, որ կեանքի է կոչուել Հայոց Հայրապետի երբեմնի տեսիլքը եւ բարերաների նախանձախնդիր աշխատանքի ու նուիրատուութեան շնորհիւ եկեղեցին եւ յարակից շինութիւններն այլեւս վերակենդանացել եւ ապրում են:
Այնուհետեւ վանքի շրջափակում հիւրերին ազգագրական երգերի ու պարերի կատարումներով դիմաւորեցին Մայր Աթոռի եւ Հբըմ-ի հովանու ներքոյ գործող Երեւանի Նոր Նորքի, Արաբկիրի եւ Գիւմրու հայորդեաց տների սաները:
Տարածքում կատարուած շրջայցից յետոյ, Ամենայն Հայոց Կաթողիկոսի բարձր նախագահութեամբ, նորոգուած մասնաշէնքում կատարուեց օրհնութեան կարգ:
Արարողութեան աւարտին ամէնքին ողջունեց Մայր Աթոռ Սուրբ Էջմիածնի հոգեւոր-կրթական բարձրագոյն հաստատութիւնների վերատեսուչ Գերաշնորհ Տ. Գեւորգ եպիսկոպոս Սարոյեանը: Սրբազանը նշեց, որ հայ ժողովրդի ինքնութեան պահպանման գործօններից ամենակարեւորը կրթուած եւ դաստիարակուած սերունդ ունենալն է, ինչին եւ նպատակաուղղուած է եղել Թրբանճեան ընծայարանի հիմնադրումը Հայոց Հովուապետի կողմից 2012 թուականին: Գեւորգ Սրբազանն ընդգծեց, որ ընծայարանն արդէն իր արժանի տեղն է գրաւել Մայր Աթոռի հոգեւոր-կրթական բարձրագոյն հաստատութիւնների շարքում` անցնող տարիների ընթացքում տալով յիսունից աւելի շրջանաւարտներ, որոնք համալրել են ինչպէս հոգեւոր, այնպէս եւ աշխարհիկ կրթօջախները: Երախտագիտութիւն յայտնելով բարերարների ընտանիքին` վերատեսուչ Սրբազանը շեշտեց, որ նրանք իրենց գործով բարի օրինակ են ծառայում յետագայ սերունդներին: Նա վստահեցրեց նաեւ, որ նորոգուած մասնաշէնքը լաւագոյնս կը ծառայի ընծայարանի կարիքներին:
Այս առիթով իր ուրախութիւնն արտայայտեց նաեւ ԱՄՆ Հայոց Արեւմտեան թեմի առաջնորդ Գերաշնորհ Տ. Յովնան արքեպիսկոպոս Տէրտէրեանը` նշելով, որ շնորհիւ Ամենայն Հայոց Հայրապետի ջանքերի եւ Թրբանճեան ամոլի առատաձեռնութեան, այսօր ամէնքն ականատեսն են Հայ Եկեղեցու կեանքում կարեւոր եւ պատմական իրադարձութեան: Վկայելով Թրբանճեան ընտանիքի նուիրեալ կեանքի, հաւատաւոր ու մարդասէր ոգու, ինչպէս նաեւ Ս. Էջմիածնի նկատմամբ նրանց սիրոյ մասին` Հովնան արքեպիսկոպոսը նշեց, որ ազգի կեանքն առաւել յարատեւ է դառնում, երբ ուշադրութիւն է դարձւում ազգի դաստիարակութեանն ու կրթութեանը: Սրբազանը շնորհակալութիւն յայտնեց Վեհափառ Հայրապետին` ազգօգուտ այս իրագործման` ընծայարանի հաստատման առիթով եւ մաղթեց, որ Նորին Սրբութիւնն երկար ու քաջառողջ հովուապետութեամբ կեանքի կոչի իր բոլոր երազներն ու սպասումները` ի պայծառութիւն Հայոց Եկեղեցու եւ ազգի:
Ամենայն Հայոց Կաթողիկոսին եւ բարերարների ընտանիքին ողջունեց նաեւ Շիրակի մարզպետ Արթուր Խաչատրեանը` կարեւորելով կրթական հաստատութեան դերն ու նշանակութիւնը մարզի եւ ողջ Հայաստանի համար: Մարզպետը վստահութիւն յայտնեց, որ ընծայարանը կշարունակի պատրաստել գիտակ եւ հայրենասէր երիտասարդներ, որոնք իրենց արժանի ներդրումը կ'ունենան թե՛ հոգեւոր, թե՛ աշխարհիկ ասպարէզներում, կը սերմանեն ու կ'օգնեն պահպանել ազգային արժէքները, հաւատքը եւ հայոց ինքնութիւնը:
Բացման արարողութիւնն ամփոփուեց Գարեգին Բ. Ամենայն Հայոց Հայրապետի օրհնութեան խօսքով: Նորին Սրբութիւնը փառք վերառաքեց առ Երկնաւոր Տէրը, որ Իր շնորհները հեղել է հինաւուրց վանական համալիրի վրայ, եւ խորհրդային անաստուածութեան տարիներից յետոյ հնամենի տաճարում հաւատաւոր հայորդիները վերստին կարողանում են իրենց աղօթքը բարձրացնել առ Աստուած:
Վեհափառ Հայրապետը գոհունակութեամբ արձանագրեց, որ Ջերալդ եւ Փատրիսիայ Թրբանճեանների աջակցութեամբ տարիներ առաջ հնարաւոր դարձաւ իրագործել վանական համալիրում նաեւ կրթական կեանքը վերականգնելու ծրագիրը: Հայոց Հովուապետը հաստատեց, որ ընծայարանի կրթական գործունէութեամբ հինաւուրց վանական համալիրը վերստին կծաղկի ու կը պայծառանայ, ինչը զարկ կը տայ նաեւ վանական կեանքին:
Նորին Սրբութիւնը ներկաներին տեղեկացրեց, որ ընդարձակ ծրագրի յաջորդ փուլում կը կատարուի վանքի նորոգութիւնը եւ տարածքի բարեկարգումը, միաժամանակ ընծայարանի համար կը կառուցուի նաեւ հանրակացարանային նոր մասնաշէնք` հնարաւորութիւն ընձեռելով ընդարձակել աշակերտների թիւը:
Այս առիթով Ամենայն Հայոց Կաթողիկոսն իր գնահատանքը փոխանցեց բարեգործ Թրբանճեան ընտանիքին` դրսեւորած յանձնառութեան ու նախանձախնդրութեան համար: Վեհափառ Հայրապետն իր օրհնութիւնը բերեց նաեւ ԱՄՆ Հայոց Արեւմտեան թեմի առաջնորդին, ընծայարանի տեսչութեանը եւ կատարուած աշխատանքներին իրենց գործուն մասնակցութիւնը բերած բոլոր հոգեւորականներին եւ աշխարհականներին:
Վերջում Ամենայն Հայոց Կաթողիկոսը «Պահպանիչ» աղօթքով իր օրհնութիւնը բաշխեց ներկաներին:
